Aala Khushit Samindar Lyrics in Marathi – आला खुशींत्‌ समिंदर

आला खुशींत्‌ समिंदर, त्याला नाहीं धिर,
होडीला देइ ना ग ठरूं,
सजणे, होडीला बघतोय्‌ धरूं !

हिरवं हिरवं पाचूवाणी जळ,
सफेत्‌ फेसाची वर खळबळ,
माशावाणी काळजाची तळ्‌मळ,
माझि होडी समिंदर, ओढी खालींवर,
पाण्यावर देइ ना ग ठरूं,
सजणे, होडीला बघतोय्‌ धरूं !

तांबडं फुटे आभाळांतरीं,
रक्तावाणी चमक्‌ पाण्यावरी;
तुझ्या गालावर तसं काहीतरी !
झाला खुळा समिंदर, नाजुक्‌ होडीवर
लाटांचा धिंगा सुरू
सजणे, होडीला बघतोय्‌ धरूं !

सूर्यनारायण हंसतो वरी
सोनं पिकलं दाहिदिशांतरीं
आणि माझ्याहि नवख्या उरीं !
आला हंसत समिंदर, डुलत फेसावर
होडीशीं गोष्टी करूं
सजणे, होडीला बघतोय्‌ धरूं !

गोर्‍या भाळीं तुझ्या लाल्‌ चिरी,
हिरव्या साडीला लालभडक धारी;
उरीं कसली ग, गोड शिरशिरी?
खुशी झाला समिंदर, त्याच्या उरावर
चाले होडी भुरुभुरू
सजणे, वार्‍यावर जणुं पांखरूं !